Te hapūtanga me te rongoā āraimate Pregnancy and immunisations
Kia hapū koe, e tūtohu ana mātou kia whiwhi koe i ngā rongoā āraimate ki te mare tekekō, ki te mate rewharewha me te KOWHEORI-19.
This content is available in other languages and alternate formats:
On this page
Ngā rongoā āraimate e hiahia ana koe mehemea kei te whakamahere koe kia hapū
Kei te tūtohu mātou tērā kua whiwhi koe i ngā rongoā āraimate e tika ana ā mohoa nei mēnā e whakamahere ana kia hapū koe.
He mea tino nui te mōhio mēnā kei te whai awhiriki koe ki:
- te mate karawaka
- te mate karawaka Tiamana
- te koroputa hei.
Kāore e taea e koe te whiwhi ēnei rongoā āraimate i a koe e hapū ana, ka mutu ka tūkino pea rātou i a koe, i tō pēpi e tupu ana hoki.
He mea nui tō whiwhi i ngā pota e 2 o te rongoā āraimate MMR i mua i te kotahi marama i mua i te hapūtanga. Kāore e taea e koe te whiwhi te rongoā āraimate MMR i a koe e hapū ana.
Nā te pānga mai o te mate karawaka i te hapūtanga e tino māuiui ai pea koe, e puta ai pea hoki ko te tahe, te materoto, me te whānau kokoti tau.
Nā te mate karawaka Tiamana e puta ai pea ngā mate whakawhānau kino — pēnei i te turi, ngā mate manawa, me te mate roro.
Kia mōhio mai ai koe mēnā kua whiwhi kē koe i tēnei rongoā āraimate, whakapā atu ki tō rata, tō nēhi, tō kaiwhakarato hauora rānei me te pātai atu mēnā kua whiwhi koe i ngā pota e 2 o te rongoā āraimate MMR.
Ki te kore koe e taea te whakaū mēnā kua whiwhi koe i tēnei rongoā āraimate, ka tūtohua me whiwhi te rongoā āraimate e koe hei te wā wawe ka taea. Ka koreutu tēnei. Kāore he tūraru mō te whiwhi pota tāpiri o te MMR — ko te mea nui kia mōhio mai koe, kua whiwhi i ngā pota e 2.
Tāpuitia he rongoā āraimate MMR
Nā te koroputa hei i te hapūtanga e tūkino ai pea i tō tamaiti, kāore anō i whānau mai, ka mutu e puta ai pea te materoto.
Ki te kore koe e taea te whakaū mēnā kua pāngia koe e te koroputa hei, mēnā rānei kua whiwhi rongoā āraimate koe, e kaha ana te tūtohu kia whiwhi koe i te rongoā āraimate koroputa hei i mua i te hapūtanga. Ko te āhua $70 te utu.
Kāore e taea e koe te whiwhi te rongoā āraimate koroputa hei i a koe e hapū ana.
Mō te rongoā āraimate koroputa hei
Ngā rongoā āraimate e hiahia ana koe i a koe e hapū ana
Ka nui ake te tūraru o ētahi mate i a koe e hapū ana. Ka taea e koe te tiaki i a koe mē tō pēpi i a koe e hapū ana mā te whiwhi i ngā rongoā āraimate e 3.
Ahakoa kāore ngā rongoā āraimate e pā ana ki tō pēpi, māu e tuku māori noa ētahi o tō awhikiri ki tō pēpi. Ko te tikanga o tēnei, hei te whānautanga mai ka whai whakamaru te pēpi tae ana ki te wā e pakeke ana ia ki te whiwhi rongoā āraimate. He mea tino nui tēnei mō te mare tekekō.
He tino mōrearea te mare tekekō mā ngā pēpi — inarā mā te hunga kāore anō kia whiwhi i ngā rongoā āraimate. Neke atu i te haurua o ngā pēpi kāore anō kia tae atu ki te 12 marama te pakeke ka pāngia e te mare tekekō me haere rātou ki te hōhipera, ka mutu tae atu ki te 1 i roto i te 50 o ēnei pēpi ka mate.
Mā te whiwhi rongoā āraimate i a koe e hapū ana e tiaki ai i tō pēpi tae ana ki te wā e taea ai e rātou te whiwhi ā rātou rongoā āraimate tuatahi kia tae rātou ki te 6 wiki te pakeke. E pēnei ana nā te mea ka tukuna tō awhikiri ki tō pēpi mā te whenua.
Kua pai katoa te kawekawe o te rongoā āraimate mare tekekō ina tukuna i te wiki 16 ki te wiki 26 o te hapūtanga, engari kua wātea, kua koreutu hoki mai i te wiki 13 o ngā hapūtanga katoa.
Te tāpui i tētahi rongoā āraimate mare tekekō koreutu
Ki te pāngia koe e te mate rewharewha i a koe e hapū ana, ka nui ake te noho tūraru āu ki te pānga a te pūkahu kakā me te nui ake o te tūpono kia hōhiperatia koe.
Nā te mate rewharewha e nui ake ai te tūponotanga o ngā raruraru mā tō pēpi pēnei i te whānau kokoti tau, te tahe, te materoto me te iti ake hoki o te taumaha o te pēpi i te whānautanga.
Ka taea e koe te whiwhi te rongoā āraimate rewharewha koreutu, ahakoa te wāhanga o tō hapūtanga.
Te tāpui i tētahi rongoā āraimate rewharewha
Nā te pānga mai a te KOWHEORI-19 e tino māuiui ai te hunga e hapū ana.
Nā te whiwhi i te rongoā āraimate KOWHEORI-19 e tino iti ai te tūponotanga ka tino māuiui koe. E tiaki ana hoki tēnei i tō pēpi, he takunetanga hoki e whakaatu ana ka whiwhi paturopi ngā pēpi mā te whenua hei tiaki i a rātou i te KOWHEORI-19.
I tua atu i ō pota KOWHEORI-19 e 2 tuatahi, ka taea hoki e te hunga hapū neke atu i te 16 tau te pakeke te whiwhi āraimate turuki.
Ki te whai koe i tētahi āraimate turuki e tūtohua ana me tatari koe neke atu i te 6 marama mai i te rongoā āraimate KOWHEORI-19, i te pokenga KOWHEORI-19 rānei.
Tāpuitia he rongoā āraimate KOWHEORI-19
Ngā rongoā āraimate mā māmā me te whānau whai muri i te whānautanga o tō pēpi
Kua tino whakaraerae ngā pēpi hou tae ana ki te wā kua whiwhi rātou i ngā rongoā āraimate katoa e tika ana. Nā te whiwhi a ngā mema katoa o te whānau i ngā rongoā āraimate katoa, e hangaia ai he mirumiru whakamaru hei tiaki i te pēpi.
Mēnā kāore koe i whiwhi rongoā āraimate ki ētahi mate i mua, i waenganui rānei i tō hapūtanga ka taea ērā te whiwhi e koe whai muri i te whānautanga o tō pēpi. He mea hira māu, mā tō whānau hoki, ki te mahi pēnei kia tiakina pai ai tō pēpi tae noa ki te wā e nui ai tōna pakeke kia pai ai te tuku o te rongoā āraimate ki a ia.
Whai muri i te whānautanga o tō pēpi, ka tūtohua pea kia whiwhi koreutu koe i te rongoā āraimate karawaka, repe hūware pupuhi me te karawaka Tiamana (MMR). Me wawe tonu tō whakatutuki i tēnei.
Te rongoā āraimate karawaka, repe hūware pupuhi me te karawaka Tiamana (MMR)
Mēnā kua mahue he rongoā āraimate, kaua e āwangawanga, ka taea te whai te nuinga o ngā rongoā āraimate kāore anō kia whiwhi. Ki te kore koe e tino mōhio mēnā kua whiwhi koe, ko te whānau rānei i ngā rongoā āraimate e tika ana ā mohoa nei, whakapā atu ki tō rata, tō nēhi, tō kaiwhakarato hauora rānei.
Katoa ngā rongoā āraimate i runga i te Wātaka Tuku Awhikiri ā-Motu he koreutu, he haumaru hoki i a koe e whāngote ana.
Te tāpui i tētahi rongoā āraimate
Ka taea e koe te tāpui tuihono ngā rongoā āraimate ā-hapūtanga mā Book My Vaccine.
Ka taea hoki te tāpui mā te waea: waea atu ki 0800 28 29 26 — 8am ki te 5pm, Mane ki te Paraire.
Mēnā e pai ake ana ki a koe, ka taea hoki e koe te whakapā atu ki tō rata, tō kaiwhakarato hauora rānei kia tapuitia ai he toronga whiwhi rongoā āraimate.
Te takatū mō ngā rongoā āraimate tuatahi o tō pēpi
Hei te 6 wiki te wā tika mō ngā rongoā āraimate tuatahi mā tō pēpi. E māmā ai te mahi kia wawe tō whakauru i a ia ki tētahi rata.
Ki te hiahia āwhina koe ki te whakauru atu, mā tō kaiwhakawhānau, mā te hōhipera, mā tō nēhi Tamariki Ora rānei koe e āwhina ki te whakauru i tō tamaiti ki tētahi rata, ki te whai wāhi atu rānei ki ngā rongoā āraimate mā tētahi atu kaiwhakarato hauora.
Ki te kore koe e kite i tētahi rata ki te whakauru i tō tamaiti, waea atu ki:
- Healthline ahakoa te wā ki 0800 611 116 (kua wātea ngā kaiwhakamāori), tērā rānei ki
- PlunketLine ahakoa te wā ki 0800 933 922.
Mā rātou koe e tūhono atu ki tētahi ratonga rongoā āraimate ā-takiwā.