This content is available in other languages:

On this page

Waea koreutu atu ki Healthline: 0800 611 116

Ki te māuiui koe, ko tētahi atu rānei e tiakina nei e koe, ka āhei te waea koreutu atu ki Healthline ki te kimi atu i ngā tohutohu hauora mātanga, mai i ngā tapuhi me ngā manapou.

E wātea ana a Healthline ahakoa te wā, rā mai, pō mai, i ngā rā katoa o te wiki. 

E rata ana te kāhui ki te āwhina i a koe ahakoa rā he iti noa iho te āwangawanga, kāore he take o te tatari kia kino mārika rā anō te tūāhua i mua i tō waea mai.

Waea atu ki Healthline:

  • mēnā kei te māharahara koe, kei te hokirua rānei mō tō hauora, mō te hauora rānei o tētahi atu 
  • mō ētahi tohutohu e pā ana ki tō tūāhua, mō te āwhina hoki mō ngā mahi kia mahia ā muri ake
  • mēnā kāore ō rata arowhānui, kāore rānei e taea e koe tētahi 
  • mēnā kei te hiahia tohutohu koe mō ō rongoā.

Waea atu ki Healthline: 0800 611 116external link

Kōwhiria te tautoko e tika ana mōu

  • Kei a koe te tikanga ki te kōrero ki tētahi ngaio hauora Māori mēnā kei te waea koe i waenga i te 8am me te 8pm.
  • E wātea ana ngā ratonga kaiwhakamāori ā-waha ki te hiahia koe ki te kōrero ki tōu ake reo.
  • E wātea ana te tautoko a NZ Relay mā te tangata Turi, waimaero rongo, Turi me te Kāpō, waimaero reo ā-waha rānei, ina whakamahi rātou i ngā ratonga ā-waea.

Te kōrero ki tētahi ngaio hauora Māori

Ngā ratonga whakamāori ā-waha me te tautoko a NZ Relay

Ka aha i te wā ka waea atu koe ki Healthline

I te wā ka waea atu koe ki Healthline, ka pātai rātou ki te take o tō waeatanga atu, me ō tohumate. Ka tono pea rātou kia tukuna e koe he whakaahua, he ataata rānei o te take i waea atu nā koe, hei āwhina i a rātou kia mārama ki tō take.

Ka taea e rātou te aromatawai ō tohumate me te tohutohu i ngā mahi me whai e koe ā muri ake. Tērā pea ko:

  • te tiaki i a koe anō, i te tangata rānei e waea ana atu koe, i te kāinga - mā Healthline e tohutohu me pēhea ake.
  • te haere ki te tiro i tō rata
  • te noho mataara ki ngā tohumate me te waea atu anō ki te kino kē atu aua tohumate
  • te toro atu ki te Pokapū Haumanu Kōhukihuki, ki te taiwhanga hōhipera ohotata tūtata rānei.

Mā rātou koe e āwhina ki te kimi i ngā ratonga hauora tūtata ki a koe, mō ngā haumanu e tika ana mōu, hei tauira:

  • he ratonga rata arowhānui tuwhera i te pō
  • he taiwhanga hōhipera ohotata
  • he kēmehi
  • he taiwhanga niho tuwhera i te pō

Waihoki, mā Healthline koe e tūhono ki tētahi ratonga waka tūroro ina hiahiatia. He koreutu ngā waka tūroro i te rohe o Te Whanganui-a-Tara. I ētahi atu rohe o te motu, me utu ngā tūroro i a Hato Hone mō ētahi o ngā take waka tūroro

Ngā utu waka tūroro wāhi noa — Hato Honeexternal link

Te kōwhiri ki te kōrero ki tētahi ngaio hauora Māori

Mai i te 8am ki te 8pm ka āhei koe te kōwhiri ki te kōrero ki tētahi ngaio hauora Māori. Ka kōrero rātou ki a koe kia mārama ō āwangawanga hauora ki a rātou, mā rātou hoki ko koe me tō whānau e tautoko ki te whai wāhi atu ki te tiakitanga e hiahia ana koe i tō rohe.

E tukuna ana te ratonga haumanu i runga anō i te mōhio ki Te Ao Māori me te tikanga, kia pai ai te wheako ki ngā whānau Māori.

Te tautoko whakawhiti kōrero

Open all

E wātea ana ngā kaiwhakamāori ā-waha, ā, e wātea ana tae atu ki te 150 reo, ka taea hoki te kāhui o Healthline te whakarite kei te waea hoki tētahi kaiwhakamāori ā-waha.

Hei te wā ka waea atu koe, me whakamōhio atu ka hiahia koe ki tētahi kaiwhakamāori ā-waha me te reo ka kōrerotia.

Ka taea e te kāhui o Healthline te whai wāhi atu ki ngā NZ Relay Services hei tautoko i a koe. Ka wātea noa iho ngā NZ Relay Services i ngā haora whāiti.

NZ Relay Servicesexternal link

Tonoa he whakahokinga waea

Ki te kore koe e hiahia ki te āwhina, ki te tohutohu rānei i taua wā tonu, ka āhei koe te tono a Healthline ki te waea atu ki a koe.

E taea ai kia pērā, haere ki te paetukutuku a Healthline, me whakauru koe i ētahi taipitopito ruarua nei, ā, ka whakahoki kōrero tētahi tapuhi, tētahi manapou rānei ki a koe.

Tonoa he whakahokinga waea — Healthlineexternal link

Te ratonga, te matatapu me ō mōtika

Open all

E utua ana a Healthline e Health New Zealand | Te Whatu Ora. E whakaratoa ana tēnei ratonga e Whakarongorau Aotearoa — New Zealand Telehealth Services.

Whakapā atu ki — Whakarongorau Aotearoaexternal link

He ōrite tonu ngā mōtika a te hunga waea atu ki Healthline ki ō ētahi atu kiritaki o ngā ratonga hauora.

Pānuitia ngā kaupapahere matatapu a Whakarongorau ki tā rātou paetukutuku.

Matatapu — Whakarongorau Aotearoaexternal link

Ētahi atu tautoko a-waea

Open all

Rapu tautoko mō ngā kano āraimate KOWHEORI, mō te rewharewha, mō te karawaka, mō te mare tekekō hoki. E wātea ana mai i te 8am ki te 6pm, i te Mane ki te Paraire.

Waea atu ki: 0800 28 29 26

Hei tautoko i te Hapori Hauā ki ngā whakamātautau KOWHEORI, ngā whakawāteatanga mau maruhā, te whakahaere KOWHEORI i te kāinga, me ngā āwangawanga hauora whānui.

Ka whakautua tō waea e tētahi tangata whai wheako, mātauranga rānei o te hāuatanga, i waenga i te 8am ki te 6pm, i te Mane ki te Paraire. I waho ake o aua wā, ka whakautua ngā waea e tētahi mema matatau o te kāhui o Healthline.