Te rongoā āraimate mare tekekō (pertussis) Whooping cough (pertussis) vaccine
Ka tino kino pea te mare tekekō, inarā mā ngā pēpi kāore anō kia tae atu ki te 12 marama te pakeke. Ki te hapū koe, me whiwhi e koe he rongoā āraimate mai i te wiki 16 o ia hapūtanga hei tiaki i tō pēpi. Ka whiwhi ai ngā pēpi i te 3 pota, kia tae rātou ki te 6 wiki, ki te 3 marama, ki te 5 marama hoki te pakeke. Kua tukuna hoki ngā pota āpiti hei te 4, te 11, te 45 me te 65 tau te pakeke.
This content is available in other languages:
He aha tā te rongoā āraimate mare tekekō e tiaki ana i a koe
Mā te mare tekekō e puta ai te uaua o te hēhē me te maremare kino. Ko ētahi wiki, ko ētahi marama rānei te noho a te maremare, koinā te take e kīia nei ā tōna wā ko 'te maremare o te 100 rā.'
Ka taea pea te whakaputa i te pūkahu kakā, te mate hukihuki, me ētahi atu take ā-roro. Neke atu i te haurua o ngā pēpi kāore anō kia tae atu ki te 12 marama te pakeke ka pāngia e te mare tekekō me haere rātou ki te hōhipera, ka mutu tae atu ki te 1 i roto i te 50 o ēnei pēpi ka mate.
Māmā noa te horapa o te mate nei i roto i te whānau mā te mare me te matihe. Tere tonu hoki tana horapa haere i roto i ngā kura kōhungahunga me ngā kura.
Kāore e tau te rere haere o te mare tekekō i Aotearoa. Ka puta ana he urutā, ka pā te mate nei ki te hia mano nei o ngā tāngata.
Rapua he kōrero anō mō ngā tohumate, ngā pūtake, me te maimoatanga.
Āhea e whiwhi ai koe i te rongoā āraimate mare tekekō
Me whiwhi koe i ngā rongoā āraimate maha hei tiaki i a koe mō te roanga o tō ora.
He koreutu te rongoā āraimate mare tekekō mā te hunga hapū, mā ngā tamariki katoa kāore anō kia tae atu ki te 18 tau te pakeke me ngā pakeke mai i te 45 ki te 65 tau te pakeke.
I te wā o ia hapūtanga
Ka tīmata te tiaki i ō tamariki i te mare tekekō i te wā o te hapūtanga.
He tino mōrearea te mare tekekō mā ngā pēpi - inarā mā rātou kāore anō kia whiwhi rongoā āraimate. Neke atu i te haurua o ngā pēpi kāore anō kia tae atu ki te 12 marama te pakeke ka pāngia e te mare tekekō me haere rātou ki te hōhipera, ka mutu tae atu ki te 1 i roto i te 50 o ēnei pēpi ka mate.
Mā te whiwhi rongoā āraimate i a koe e hapū ana e tiaki ai i tō pēpi tae ana ki te wā e taea ai e rātou te whiwhi ā rātou rongoā āraimate tuatahi, arā kia tae rātou ki te 6 wiki te pakeke. E pēnei ana nā te mea ka tukuna tō awhikiri ki tō pēpi mā te whenua.
Kua pai katoa te kawekawe o te rongoā āraimate mare tekekō ina tukuna mai i te wiki 16 ki te wiki 26 o te hapūtanga, engari kua wātea, kua koreutu hoki mai i te wiki 13 o ngā hapūtanga katoa.
Te hapūtanga me te rongoā āraimate
Hei te 6 wiki te pakeke
Ka pakeke haere ana ngā pēpi, ka mimiti haere te awhikiri i whakawhiti mai ai i te whenua, nā reira me whai rātou i tō rātou ake awhikiri ki te mare tekekō i te wā wawe ka taea.
Kia tae tō pēpi ki te 6 wiki te pakeke, me whiwhi ia i te pota tuatahi o te 3 pota o te rongoā āraimate mare tekekō.
Hei te 3 marama te pakeke
Hei te 3 marama te pakeke, ko te wā tika mō te pota tuarua o te rongoā āraimate mare tekekō.
Hei te 5 marama te pakeke
Hei te 5 marama te pakeke ko te wā tika mō te pota tuatoru o te rongoā āraimate mare tekekō.
Hei te 4 tau te pakeke
Ka mimiti haere te whakamaru ki te mare tekekō i te roanga o te wā, nā reira e hira ai te whiwhi i tētahi pota āpiti kia tae rātou ki te 4 tau te pakeke — i mua i te tīmatatanga ki te kura.
Mai i te 11 tau te pakeke
Ko tētahi anō pota āpiti hei āwhina i te ārai atu i te mare tekekō kei te tūtohua mai i te 11 tau te pakeke.
Kua wātea tēnei mā ētahi kura mā ngā ākonga Tau 7, he koreutu hoki mai i tō rata, i tō nēhi, i tō kaiwhakarato hauora rānei.
Ngā pakeke
E tūtohua ana kia whai ētahi pakeke i te pota āpiti mare tekekō i ia 10 tau, mōkito noa nei. Kei roto o ēnei ko:
- te hunga e mahi ana ki te kōhungahunga me ngā tāngata whakaraerae
- ērā e noho tahi ana ki te pēpi hou
- ērā e noho ana i runga i te tūraru teitei ake mō te mate kino nā te mare tekekō te take, hei tauira ko ērā e pāngia nei e te mate romahā tauroa.
E tukuna ana te rongoā āraimate kauae timu, whakapokenga korokoro (diphtheria) me te mare tekekō (Boostrix):
- mai i te wiki 13 o ia hapūtanga - me whai whakaaro ki te tāpui i te Boostrix i waenga i te 16 ki te 26 wiki o te hapūtanga nā te mea koinei te wā e tino whaihua ai te rongoā āraimate
- mā ētahi tāngata e 45 tau te pakeke
- mā ngā tāngata katoa mai i te 65 tau te pakeke - mēnā kua whiwhi koreutu kē koe i tētahi rongoā āraimate kauae timu me te whakapokenga korokoro mai i te tau 65, kāore koe e māraurau mō te rongoā āraimate Boostrix koreutu.
Ki te kore koe e māraurau mō te pota āpiti o te rongoā āraimate mare tekekō koreutu, ka taea te utu atu. Mā tō kaituku rongoā āraimate e tohutohu i a koe mō te tūtohunga mō te auau o te whiwhi i te pota āpiti.
Kei waenga i te $40 me te $90 te utu, kei te āhua tonu o te wāhi e tāpui ai koe i te toronga.
Ko tēhea te rongoā āraimate ka whakamahia
Ko te whakamaru ki te mare tekekō kei te tukuna i roto i ngā rongoā āraimate e tiaki nei hoki ki ētahi atu mate.
- Kua tukuna ki ngā pēpi ko te rongoā āraimate whakapokenga korokoro, mate kauae timu, mare tekekō, whakamemeke, mate ate kakā momo B, me te mate haemophilus influenzae momo b (Hib).
- Kua tukuna ki ngā tamariki e 4 tau te pakeke ko te rongoā āraimate whakapokenga korokoro, mate kauae timu, mare tekekō, me te whakamemeke.
- Kua tukuna ki te katoa neke atu i te 11 tau te pakeke ko te rongoā āraimate kauae timu, whakapokenga korokoro me te mare tekekō (Boostrix).
Kāore e taea kia māwehe ēnei - kāore e taea e koe te whai tētahi rongoā āraimate mare tekekō anake.
Ngā mate āpiti me ngā tauhohe
Kua rārangitia ngā mate āpiti me ngā tauhohe o ia momo rongoā āraimate i ā rātou whārangi.
Tāpuitia he rongoā āraimate mare tekekō
He koreutu te rongoā āraimate mare tekekō mā te hunga hapū, mā ngā tamariki katoa kāore anō kia tae atu ki te 18 tau te pakeke me ngā pakeke mai i te 45 ki te 65 tau te pakeke.
Ki te mate koe ki te utu, kei waenga i te $40 me te $90 te utu, kei te āhua tonu o te wāhi e tāpui ai koe i te toronga.
Mō te hunga 13 tau te pakeke, neke atu rānei
Ko ngā rongoā āraimate mā te tangata takitahi, mā ngā rōpū 13 tau te pakeke, neke atu rānei ka taea te tāpui tuihono, mā te waea rānei.
Tāpui tuihonotia: Book my vaccine
Tāpuitia mā runga waea: 0800 28 29 26 (8am ki te 5pm, Mane ki te Paraire).
Mā te hunga 12 tau te pakeke, iti iho hoki
Tāpuitia hāngai tonu mā tō tākuta, tō nēhi, tō kaiwhakarato hauora rānei mēnā kei te tāpui koe mā ngā tamariki kei raro i te 13 tau te pakeke.
Ka taea e koe te rapu i Healthpoint kia kite ai kei hea e tukuna ai ngā rongoā āraimate Boostrix, e kimi ai hoki i ngā taipitopito whakapā kia mōhio mai koe he aha te utu.
Kimihia he wāhi Boostrix tūtata ki a koe — Healthpoint
Mēnā kāore he rata ōu, he rārangi me te mapi tō Healthpoint mō ngā wāhi e taea ai e te katoa kia whiwhi ai i tētahi rongoā āraimate. Kei roto i ēnei ko ngā kēmihi me ngā rata e rāhiri nei i ngā tūroro kāore i whakaurua.
Te whai i ngā rongoā āraimate kāore anō kia whiwhi
Mēnā kua mahue he rongoā āraimate, kei te pai noa iho. Ka taea e koe te whai te nuinga o ngā rongoā āraimate kāore anō kia whiwhi.
Mō ngā tohutohu, kōrero ki tō rata, tō nēhi, tō kaiwhakarato hauora e whakaponotia ana.