Aafiaga ma tulaga e ilitata ai le tino i le tuipuipui COVID-19 COVID-19 vaccine side effects and reactions

E pei lava o le tele o isi fualaau, e te ono faalogoina ni aafiaga e lē ogaoga tele pe a mavae nai aso talu na fai lou tuipuipui COVID-19.

O tulaga nei e masani ai, ma o se faailo o lena e taumafai lou tino e tetee atu i le siama.

O le tele o aafiaga nei e lē umi se taimi e aliae ai ma e lē taofia ai lou faia o tui faaopoopo po o au feau masani o le aso. E masani na amata aliae a o le i mavae atu se aso po o aso e 2 talu na fai lau tuipuipui.

O aafiaga pito taatele na lipotia mai:

• tiga, mūmū po o le fula vaega o le tino na tui
• lagona le ivā po o le gapelu
• tiga le ulu
• tiga maso po o le tiga sooga ponaivi
• faamaalili
• niniva
• fufula totoga matauaola
• faafaufau
• fiva
• ese le faalogo i le fatafata.

E tutusa aafiaga o le tuipuipui COVID-19 e aafia ai tamaiti ma tupulaga ma aafiaga o vaaia i tagata matutua. E iai aafiaga e faatoa aliae pe a uma na fai le tui lona lua.

Afai ua ese lau faalogo

E mafai na e:

• tago e tuu se solo susū po o se pepa aisa i le vaega o le tino na tui mo sina taimi
• malolo ma ia tele le vai e inu
• inu le paracetamol po o le ibuprofen.

E iai aafiaga e sili atu ona ogaoga ae seāseā tupu, e pei o le ilitata leaga.

E seāseā tupu se ilitata leaga mai se tuipuipui. O le mafuaaga tonu lena e vaavaai lelei ai mo le 15 minute pe a uma na fai le tuipuipui.

Ua aoaoina atoatoa lelei tagata e faia tuipuipui ia iloa le auala e togafitia ai pe a tupu.

Ua saunia e le Medsafe se lipoti auiliili o aafiaga na lipotia mai.

Lipoti tuipuipui COVID-19 — Medsafe (external link)

Myocarditis ma le pericarditis

O le myocarditis o se tulaga ua mu ai maso o le fatu. O le pericarditis o se mu i alatoto e faatupua se taga e sio atoa ai le fatu. O tulaga masani nei e aliae pe a pepesi le siama e aofia ai le COVID-19, ae o aafiaga ogaoga foi nei o le tuipuipui COVID-19 e seāseā tupu.

O āuga o le myocarditis po o le pericarditis e fesootai i le tuipuipui e masani na aliali i totonu o nai aso, uluai vaiaso talu na fai le tuipuipui.

E tele na aliae le myocarditis i tagata mai le 16 i le 30 tausaga le matutua, aemaise lava mai le 16 i le 18 tausaga le matutua, ma e pito aafia tele ai tamaloloa.

O auga o le myocarditis ma le pericarditis e aofia ai le:

• fufusi, mamafa, ese le faalogo po o le tiga o lou fatafata po o le ua
• faigata na mānava po o le tau mānava
• faalogoina le tau matapogia po o le niniva o le ulu
• tātā vale, faatatope, po o le tātā malosi o le fatu, po o se faalogona peiseai o ‘fetoai le tātā.’

E tau lē aafia tele ai tamaiti i aafiaga nei ae mafai lava ona leai se tala e fai atu ai i auga o latou faalogoina. E fautuaina lou fesili i le fanau po o ā mai pe a uma na fai se tuipuipui. Faafesootai le vaega faalesoifua maloloina pe a foliga ma'i po o se mea o e popole ai.

Aafiaga o mea e ilitata leaga ai le tino

E seāseā tupu aafiaga o mea e ilitata leaga ai le tino ae ogaoga faaletonu e maua ai. E masani ai le aliae o aafiaga i le faatoa uma na fai o lau tuipuipui, ma o le mafuaaga tonu lena e tatau ai ona e faatali mo le 15 minute. Ua aoaoina atoatoa lelei tagata e faia tuipuipui mo le togafitia o se mea ua ilitata ai lou tino.

E fautuaina le taofi o le toe fai o le tuipuipui lava e tasi, pe afai na e aafia mai mea na ilitata ai lou tino i se tui na fai o le tuipuipui lava lea po o se vaega o le tuipuipui lava lea.

Bell’s palsy

O se tasi o aafiaga seāseā tupu na lipotia, o le sipa o le isi itu o foliga mo se vaitaimi le tumau (Bell's palsy), ma e aafia ai le 1 mai le 1,000 faasolo atu i le 1 mai le 10,000 tagata na suesueina i faataitaiga faafomai.