Tuipuipui fulū Flu vaccine

E maua le tuipuipui fulū mai le aso 1 Aperila o tausaga taitasi. E fautuaina le tuipuipui fulū mo tagata uma amata mai le 6 masina tausaga le matua i tausaga uma. E fai fua mo fafine maitaga, tagata ua atoa le 65 tausaga, ma le toatele o isi tagata.

This content is available in other languages and alternate formats:

Alternative formats

O tulaga e puipuia ai oe e le tuipuipui fulū

E fesuisuiai i taimi uma siama o le fulū. O le mea tonu lena e tatau ai ona sui le tuipuipui i tausaga taitasi ia tutusa ma ituaiga siama fou. O se puipuiga sili mo oe le fai o le tuipuipui fulū i tausaga uma.

E faafuasei le oso o auga o le fulū e aofia ai le fiva, faamaalili, tiga maso, tafe le isu, tale, tau mānava, ma tiga le manava. E vaiaso atoa pe umi atu foi o taoto ona o tulaga ua maua ai.

E masani ai le pepesi o le fulū pe a fetalei ma mafatua ma e matele tulaga faapenei i le vaitau malulu.

E mafai na e tigaina ai i le fulū, tusa lava pe afai e te aumalosi ma maloloina lelei. E mafai na tigaina ai tamaiti. E mafai na e faapepesia i tagata e lamatia gofie, e aofia ai tagata matutua po o fafine maitaga.

Fulū (internal link)

Aafiaga o le fulū pe a e maitaga

A e maua i le fulū a o lena e te tō, e telē se avanoa e te faaletonu ai faapena lau pepe. O faaletonu e aofia ai le:

  • vave fanau
  • lē tau le mamafa lelei o pepe
  • fanau lē au po o le fanauoti.

O soo se vaitaimi lava o lou maitaga e mafai ai na fai le tuipuipui o le fulū e fai fua. Afai o tauaveina pepe i vaitau e 2 o le fulū, e fautuaina le fai o se tuipuipui i vaitau uma e lua.

Vaitaimi e fai ai tuipuipui fulū

E maua le tuipuipui fulū mai le aso 1 Aperila o tausaga taitasi, a o le i amatalia le vaitau malulu. E fautuaina le puipuia o tagata uma ua atoa le 6 masina ma luga atu le matutua mai le fulū i tausaga uma.

A faapea e le i atoa le 9 tausaga o le fanau, talanoa i le tagata e faia tuipuipui pe faamata e ono tatau le fai o le 1 pe 2 tui e puipuia ai (va i le fa vaiaso) ma e faalagolago pe na fai muamua le tuipuipui o le fulū.

E fai fua le tuipuipui fulū mo nisi tagata i le tausaga lenei 2024

E fai fua le tuipuipui fulū mo tagata e sili atu na tigaina, e aofia ai:

  • tagata ua atoa le 65 tausaga le matutua ma luga atu
  • tagata ua atoa le 6 masina le matua ma luga atu o feagai ma se faamai tumau e pei o le ma'i suka, sela, po o se faaletonu o le fatu
  • fafine maitaga
  • tamaiti ua atoa le 4 tausaga ma lalo ifo le matutua na taofia i le falemai ona o se faaletonu i le mānava, po o se talaaga o se faamai e afaina tele ai le mānava
  • tagata e faaletonu le mafaufau, e aofia ai le ma'i maliu, faamai loto mafatia, fesuisuiai faalogona, po o le afaina o le mafaufau
  • tagata o maua i le taimi nei auaunaga faapitoa mo tulaga maloloina o le mafaufau ma tuinanauga.

E mafai na fai tuipuipui fulū ua faatupeina e le malo mo tamaiti ma tagata matutua (6 masina ma luga atu le matutua) i Aotearoa Niu Sila o le Influvac Tetra.

Faamatalaga auiliili o faatulagana e fai fua ai le tuipuipui fulū — Pharmac (external link)

A moomia na e totogia le fai o se tuipuipui fulū

A faapea e te lē agavaa mo le fai fua o tuipuipui fulū, ma e leai se pepa faamaonia mai lau pule o le galuega e fai fua ai se tuipuipui fulū, ona e totogia lea o lau tuipuipui fulū. Fesili i lau fomai, tausimai, po o le vaega faalesoifua maloloina, po o le faletalavai pe afai e te lē o mautinoa.

E faasolo mai le $25 i le $45 le tau e fai ai.

Faatonu le faiga o se tuipuipui

E mafai na fai tuipuipui fulū i lau fomai, tausimai, po o le vaega faalesoifua maloloina o vaaia oe. O le tele o faletalavai e mafai ai e tagata uma ua ova atu ma le 3 tausaga le matutua na fai ai tuipuipui fulū.

E mafai na faatonu avanoa e fai ai tuipuipui fulū mo se tagata toatasi, po o se vaega toatele i le Book My Vaccine, pe faatonu i luga o le telefoni.

Faitau faamatalaga i auala e faatonu ai le fai o se tuipuipui, po o le fia maua o se lagolagosua e patino i tulaga o e moomia.

Faatonu se avanoa e fai ai tuipuipui (internal link)

Aaafiaga ma tulaga e ilitata ai le tino

E pei lava o le tele o isi fualaau, e iai taimi e ilitata ai le tino i tuipuipui. E feololo, ma e lē aafia ai tagata uma.

E lē o se mea ese le feololo o tulaga e maua ai ma o foliga na e iloa ai o lo o aogā le tuipuipui e faatupu ai le malosi i lou tino.

E masani na e vaaia se mea ua ilitata ai lou tino i uluai aso talu na fai le tuipuipui, pe afai o se tulaga lea e te maua ai. E faitau itula po o aso foi e amata mou ese atu ai le tuipuipui mai lou tino.

O aafiaga sili na taatele o se tuipuipui e aofia ai:

  • feololo le fiva
  • tiga pe fula le vaega o le tino na tui.

Isi aafiaga masani

Isi aafiaga masani o le tuipuipui fulū e aofia ai:

  • tagi, ita, ma le fiu e faafilemu (pepe ma fanau laiti)
  • leai se fia 'ai
  • tiga
  • tiga le ulu.

Aafiaga o mea e ilitata ai le tino

E seāseā aliae aafiaga o mea e ilitata leaga ai le tino. Na o le 1 mai le 1 miliona tagata e maua ai.

Ua aoaoina atoatoa lelei le tagata o faia lou tuipuipui ma iloa auga e vaavaai ma vave togafitia se mea ua ilitata ai le tino.

O tulaga masani le aliae o aafiaga e ilitata leaga ai le tino pe a pasia minute mai le faatoa fai ai o le tuipuipui, ma o le mafuaaga lena e tatau ai ona e faatali mo le 20 minute pe a uma na fai le tuipuipui.