Ko e mateuteu atu ki ha ‘apoinimení Preparing for a vaccination appointment

‘Okú ke fiema‘u ‘o ‘ikai toe si‘isi‘i hifo ‘i he miniti 30 ki he 45 ki he ‘apoinimeni huhu malu‘í kakato. ‘Oku kau ki heni ha taimi talitali miniti ‘e 20 hili ‘a e huhu malu‘í.

Faka‘atā ha ki‘i taimi lōloa ange kapau ‘okú ke ha‘u mo ha kau leka ‘oku tokolahi ange ‘i he 1, pe ko ha mēmipa kehe ‘o e fāmilí, ki he huhu malu‘í.

Kapau ‘oku ‘i ai ha‘o tohi Well Child Tamariki Ora My Health Book, ‘omai ia ki he ‘apoinimení ke fakakakato ‘e he tokotaha ‘okú ne fakahoko ‘a e huhu malu‘í ‘a e lēkooti ‘o e ngaahi huhu malu‘i kuo fakahokó. ‘Oku sai pē ia kapau ‘oku ‘ikai ke ke ma‘u ‘eni, ‘oku toe lēkooti foki ‘a e ngaahi huhu malu‘í ‘i he Tohi Lēsisita Huhu Malu‘i Fakafonuá.

Fili ha vala ‘a ia ‘e lava ‘o vete pe pelu ki ‘olungá koe‘uhi ke lava ‘a e tokotaha ‘okú ne fakahoko ‘a e huhu malu‘í ‘o ngāue ki he konga ki ‘olunga ho nimá. Ko e fanga ki‘i pēpē māhina 12 kotoa ‘oku huhu kinautolu ‘i he alangá. Meí he ta‘u 1, ‘oku huhu ‘a e fānaú ‘i he nimá pe alangá.

Ha‘u mo ha me‘akai pe inu te ke ala fiema‘u lolotonga ‘a e taimi ko ‘ení.

Ki he fānaú, ‘e lava ke ke ‘omai ‘a e me‘ava‘inga ‘oku nau sai‘ia taha aí, kafu, keimi, pe tohi ke nau hanganoa ai ‘i he hili ‘a e huhu malu‘í.

Kapau ‘okú ke manavasi‘i, ha‘u mo ha mēmipa ‘i he fāmilí pe ko ha kaungāme‘a ke hoko ko ha tokoni.

‘Oku ‘ikai fiema‘u ia ke ke ‘omai ha ID (‘ilo‘i‘anga) ki he ‘apoinimení.

Kapau te ke loto ke liliu ‘a e taimi ki ho‘o ‘apoinimení, telefoni ki he feitu‘u fai‘anga huhu malu‘í ‘i he vave tahá ‘o fakahoko ange kiate kinautolu. ‘E faka‘atā ai koe ke ke puka ha taimi ‘apoinimeni fo‘ou ‘e lelei ange kiate koe. ‘E ala ave ‘a ho‘o ‘apoinimeni kimu‘á ki ha tokotaha kehe.

Kapau na‘á ke puka ha huhu malu‘i flu pe COVID-19 ‘i he ‘initanetí fakafou ‘i he Book My Vaccine te ke liliu ‘a e ‘apoinimeni na‘e puka ko iá ‘i he ‘initanetí. ‘E fiema‘u ho‘o fika ‘ilo‘i‘anga (reference) na‘e puka ‘aki ‘a e ‘apoinimení. ‘E ‘ikai ke lava ‘o liliu ‘a e ngaahi ‘apoinimeni fakatokolahi na‘e puka ‘i he ‘initanetí — te ke lava pē ‘o kaniseli ia.

Mapule‘i ho‘o ngaahi ‘apoinimení — Book My Vaccine (external link) (fehokotaki‘anga ki tu‘á)

Kapau ‘oku ‘ikai ke ke ongo‘i lelei ‘i he ‘aho ‘o e ‘apoinimení

Fetu‘utaki ki he feitu‘u fai‘anga huhu malu‘i na‘a ke puka ki aí. ‘E lava ke nau fale‘i atu pe ‘oku fiema‘u ke fakahoko ‘a e huhu malu‘í.

Kapau ‘oku ma‘u koe ‘e he COVID-19 ‘e fiema‘u ke ke toloi ho‘o taimi ‘apoinimení.

‘I he taimi ‘okú ke puka ai ha ‘apoinimeni, fakapapau‘i ke fakahoko ange ki he timí pe ‘okú ke fiema‘u ‘e koe pe ko ho‘o fānau ha tokoni lahi ange.

Te nau ala lava ‘o:

• ‘oatu ha feitu‘u ‘ata‘atā ‘oku mama‘o meí he kakai kehé
• tokoni‘i koe mo e fānau kehe ‘okú ke ‘omai ki he ‘apoinimení
• fokotu‘utu‘u ha tokoni kiate kinautolu ‘oku faingata‘a ‘enau fe‘alu‘akí mo e nga‘unu holó
• fokotu‘utu‘u ha ‘a‘ahi atu ki ‘api - ‘e ala fakahoko ‘eni fakafou ‘i ha kautaha kehe ki he mo‘ui leleí.

Talanoa ki he timi ki he kau faingata‘a‘iá

‘Oku ‘i ai ‘emau timi mavahe ma‘á e kau faingata‘a‘ia fakaesinó te ke lava ‘o telefoni ki ai houa ‘e 24 ‘i he ‘aho, ‘aho ‘e 7 ‘i he uike.

• Telefoni: 0800 11 12 13
• Text: 8988 ta‘etotongi
• ‘Īmeili: access@whakarongorau.nz

‘E tali atu ‘e ha tokotaha ‘oku ‘i ai ‘ene a‘usia pe ‘ilo ki he faingata‘a‘ia fakaesinó ‘a ho‘o telefoní meí he 8 pongipongi ki he 8 efiafi. Hili ‘a e 8 efiafi, ‘oku tali ‘a e ngaahi fetu‘utaki telefoni maí ‘e ha tokotaha ngāue kuo ako‘i ‘i he timi Healthline.

‘E lava ke ke ‘eke ange ha ngaahi fehu‘i fekau‘aki mo e:

• tokoni ki hono fakafaingofua‘i ‘a e fe‘alu‘aki ‘a e kau faingata‘a‘ia fakaesinó ‘i he ngaahi feitu‘u huhu malu‘i kehekehe
• ma‘u atu ko ia ‘o e ngaahi huhu malu‘í ‘i ha founga malu
• huhu malu‘i ‘i ‘api ma‘á u pe ko ho‘o fānaú.

‘E talanoa atu kiate koe ‘a e tokotaha ‘okú ne fakahoko ‘a e huhu malu‘í fekau‘aki mo e huhu malu‘í mo e me‘a ke ‘amanekina hili iá. ‘E ‘i ai ha faingamālie ke ‘eke ha ngaahi fehu‘i pea ‘e ‘eke atu kiate koe pe te ke loto ke fakahoko ai pē ‘a e huhu malu‘í.

‘I he ngaahi tu‘unga ‘e ni‘ihi ‘e ala fiema‘u ke ke fakamo‘oni ‘i ha la‘ipepa ke fakahaa‘i ‘okú ke loto-lelei ke fakahoko ‘a e huhu malu‘í.
‘E kole atu kiate koe ke ke talitali ‘o a‘u ki ha miniti ‘e 20 hili ‘a e huhu malu‘í ke fakapapau‘i ‘okú ke ongo‘i lelei pē mo ho fānaú.

Kapau ‘okú ke ilifia ‘i he ngaahi huí (needles)

Fakahoko ange ke ‘ilo ‘e he tokotaha ‘okú ne fakahoko ‘a e huhu malu‘í pe ‘okú ke ilifia pe ko ho‘o ki‘i tamá ‘i ha ngaahi huí (needles). Kuo ako‘i kinautolu kenau tokoni‘i koe ke ke ongo‘i fiemālie ‘i he lahi taha tenau ala lavá. ‘Oku nau lava ‘o fakahoko ha ngaahi me‘a ke tohoaki‘i ho‘o tokangá mo ha ngaahi founga ke tokoni ke fakasi‘isi‘i ‘aki ho‘o mamahi‘iá mo e loto-mo‘uá.

Ngaahi tokoni ki he huhu malu‘i ‘o e fanga ki‘i pēpeé mo e fānaú

• ‘E tokoni ‘a e talanoá, ‘ō‘ōfakí (cuddling), mo e pukepuke ‘a ho‘o fānaú kenau hanganoa ai mei he huhú pea fakanonga  kinautolu hili iá kapau tenau loto-mamahi.
• Feinga ke ke nonga. ‘Oku lava ke tala ‘e he fanga ki‘i pēpeé mo e fānaú ‘a e taimi ‘oku loto-mo‘ua ia ‘enau ongo mātu‘á.
• Ko hono fafanga ho‘o ki‘i pēpeé (kau ai ‘a e fakahuhú pe fafanga hina huhú) lolotonga hono fakahoko ‘a e huhu malu‘í ‘e lava ke tokoni ia kenau ongo‘i fiemālie ange.

‘E kole atu kiate koe ke ke talitali ‘o a‘u ki ha miniti ‘e 20 hili ‘a e huhu malu‘í ke fakapapau‘i ‘okú ke ongo‘i lelei pē mo ho fānaú.

‘Oku hokosia ‘e he kakai ‘e ni‘ihi ha ngaahi ongo‘i ‘oku tō ma‘ama‘a pē hili ‘a e huhu malu‘í. Tenau ala ongo‘i mofi pe hokosia ha mamate, pupula mo e fakakulokula ‘i he feitu‘u na‘e fakahoko ai ‘a e huhú. Ko ha fakafeangai angamaheni ‘eni ‘a e sinó ki he huhu malu‘í pea ‘oku hā mei ai ‘oku ngāue ‘a e huhu malu‘í.  ‘Oku fa‘a holo ‘o sai ‘a e ngaahi faka‘ilonga ko ‘ení hili ha ‘aho ‘e taha pe 2.

Kapau ‘oku ‘ikai ke ke hokosia ha fa‘ahinga uesia tamaki ‘oku sai pē mo ia — ‘oku kei ngāue pē ‘a e faito‘o huhu malu‘í ia.

Kapau ‘okú ke hoha‘a fekau‘aki mo ha fa‘ahinga ongo‘i hili ‘a e huhu malu‘í, fetu‘utaki ki ho‘o toketaá pe neesí. Te ke toe lava foki ‘o telefoni ki he Healthline ‘i ha fa‘ahinga taimi pē ‘i he 0800 611 116.

Ngaahi uesia, ngaahi ongo‘i mo e malu ‘a e huhu malu‘í (internal link)