Meningococcal vaccine Ngaahi huhu malu‘i ki he Meningococcal
Na‘e fakakau atu ‘a e huhu malu‘i MenB ki he National Immunisation Schedule (Taimi Tēpile Huhu Malu‘i Fakafonuá) ma‘á e fanga ki‘i pēpeé ‘i he ‘aho 1 ‘o Ma‘asi 2023. ‘E lava ‘e he fānau kotoa ‘oku si‘isi‘i hifo ‘i he ta‘u 5 ‘o fakakakato ta‘etotongi ‘enau huhu malu‘í. ‘Oku ‘atā atu ‘a e ngaahi huhu malu‘i MenB mo e MenACWY ki he to‘utupu ta‘u 13 ki he 25 ‘i he ngaahi tu‘unga fakaenofo vāofi pau.
Me‘a ‘oku malu‘i mei ai koe ‘e he ngaahi huhu malu‘i meningococcal
Ko e mahaki meningococcal ko ha mahaki ia ‘oku fakatupu ‘e he pekitīliá. ‘E lava ke iku atu ia ki ha mahaki fakatu‘utāmaki lalahi ‘e 2:
- meningitis (mofi ‘utó) — ko ha mahaki ia ‘oku hoko ki he kili tu‘a ‘okú ne ‘ufi‘ufi ‘a e fo‘i ‘utó mo e filosilivá
- septicaemia — kona ‘a e totó.
‘Oku ‘i ai ‘a e kalasi kehekehe ‘o e pekitīlia meningococcal, kau ai ‘a e A, B, C, W, mo e Y. ‘I Nu‘u Sila, ko e lahi taha ‘o e mahaki meningococcal ‘oku fakatupunga ia ‘e he pekitīlia kalasi B (group B bacteria).
‘Oku mafola ‘a e mahakí ‘i he ngaahi founga tatau mo e fofonu angamahení (common cold) — ‘i he talé mo e mafatuá, pe ko e pā atu ‘a e fāvaí (‘a‘anú).
Fakatu‘utāmaki ‘o e mahaki meningococcal
‘E lava ke tupulaki vave ‘a e mahaki meningococcal pea fakatu‘utāmaki ki he mo‘uí. ‘E lava ke tupu ai ha mate ia ‘i ha ngaahi houa si‘i pē.
‘Oku fa‘a hokosia ‘e he kakai ‘oku nau hao mo‘ui meí he mahaki meningococcal ha ngaahi uesia fakatu‘utāmaki taimi lōloa, kau ai ‘a e tu‘usi ‘o e va‘é, tuli ‘a e telingá, hamu, mo e ngaahi fo‘i piki ‘i he kilí.
‘Oku malu‘i ‘e he ngaahi huhu malu‘i meningococcal meí he pekitīlia ‘okú ne fakatupunga ‘a e mahaki meningococcal.
Huhu malu‘i MenB ma‘á e fānau si‘isi‘i hifo ‘i he ta‘u 5
‘I he ‘aho 1 ‘o Ma‘asi 2023, na‘e fakakau atu ai ‘a e huhu malu‘i meningococcal B (MenB) ki he National Immunistion Schedule (Taimi Tēpile Huhu Malu‘i Fakafonuá) ma‘á e fanga ki‘i pēpē māhina 3, māhina 5, mo e māhina 12.
‘E ‘oatu ki ho‘o pēpeé ‘a e huhu malu‘i MenB ko ha konga ‘enau ngaahi huhu malu‘i kuo fakataimi-tēpile‘í.
‘Oku toe ‘i ai foki ‘a e fili ke huhu malu‘i ho‘o pēpeé ki mu‘a si‘i pē ‘i he māhina 2, māhina 4, mo e māhina 12. ‘Oku ‘uhinga ‘ení ‘e toe lahi ange ‘a e ngaahi ‘apoinimení. Te ke lava ‘o talanoa fekau‘aki mo e me‘á ni mo ho‘o toketaá, neesí, pe kautaha ki he mo‘ui leleí lolotonga ‘a e ‘apoinimeni huhu malu‘i uike hono 6 ‘a ho‘o ki‘i pēpeé.
Ngaahi huhu malu‘i MenB fakakakató
Kapau na‘e ma‘u ‘e ho‘o fānau ‘enau ngaahi huhu malu‘i māhina 3, māhina 5, pe māhina 12 ki mu‘a ‘i he ‘aho 1 ‘o Ma‘asi 2023, na‘e te‘eki ai kenau ma‘u ‘a e huhu malu‘i MenB. Ka tenau lava ‘o fakakakato ia.
Ko e fānau kotoa ‘oku si‘isi‘i hifo ‘i he ta‘u 5, ‘a ia ‘oku te‘eki ai kenau ma‘u kakato ‘a e huhu malu‘i ki he MenB, tenau lava ‘o fakakakato ta‘etotongi ia ‘o a‘u ki he ‘aho 31 ‘o ‘Aokosi 2025.