Healthy Homes Initiative

‘E lava ke fakatupunga ha mahamahaki ‘a e fānau iiki´ mo e ni‘ihi kehe´ mei he nofo ‘i ha nofo‘anga ‘oku momoko mo hauhausia pea fu‘u tokolahi ‘a kinautolu ‘oku nofo fakataha. ‘E lava ke nau puke ‘i he ngaahi mahaki ko ‘eni:

• ngaahi mahaki ki he mānava´ hangē ko e niumōnia´ mo e mahaki ‘o e ma‘ama‘a´
• ngaahi mahaki ‘e lava ke faka‘ehi‘ehi mei ai hangē ko e mofi hui´ mo e mahaki kili´.

‘E lava ke ta‘ota‘ofi ‘a e hoko pe ta‘ofi ‘a e ngaahi mahaki´ mei he ‘ene a‘u ki ha tūkunga faingata‘a ‘aupito ‘i hono fakapapau‘i ‘oku māfana mo ‘ikai ke hauhausia ‘a ‘api.

‘E lava ‘e he Healthy Homes Initiative ‘o ma‘u atu ha ngaahi tokoni fakapa‘anga pē ngaahi tokoni kehe pe fakatou‘osi pē ke to e ‘ea lelei ange ‘a ho nofo‘anga ‘i ‘api´.

‘E ‘a‘ahi atu ‘emau timi ngāue´ ki homou ‘api´ ke mou talanoa ki he ngaahi fiema‘u ‘a ho fāmili´ ki mu‘a pea mou ngāue fakataha ki ha ngaahi ngāue fakalakalaka ki he nofo´.  ‘E lava ke kau ai ‘a e ngaahi me‘a´ ni:

• puipui
• faliki ‘o e fale´ ‘oku malu
• hita pe ngaahi founga ke māfana ‘a e fale´
• tokoni ki he totongi ‘o e mo‘ua ‘uhila´
• ngaahi monomono iiki
• ngaahi ‘aofi fale mo e founga ‘ave ‘o e ‘ea kovi´ ki tu‘a mei loto fale
• ngaahi mohe‘anga mo e naunau ki he mohenga´
• fakahoko ki he potungāue´ pe kautaha kehe ki ha tokoni ‘oka fiema‘u.

‘Oku ‘i ai ho‘o totonu ke ma‘u ha tokoni ta‘etotongi kapau ‘oku ‘i ai ha‘o fānau ‘oku mou nofo fakataha ‘i ‘api pea:

• ‘oku ’i ai ho‘o kaati community services card pe ma‘olalo ‘a ho tu‘unga vāhenga´.
• ‘oku mou nofo fakataha ‘i ‘api mo ha ni‘ihi ko e kau tangata‘i fonua ‘o Nu‘u Sila´ ni pe nofo ta‘e fakangatangata ‘i Nu‘u Sila´ ni.

Pea kuo´ ke tali ‘io’ ki he taha ‘o e ngaahi me‘a´ ni:

• ‘Oku ‘i ai ha taha ‘oku mou nofo fakataha ‘i ‘api ‘oku fokoutua ‘i he mofi hui´ (lolotonga ma‘u faito‘o bicillin injections)?
• ‘Oku ‘i ai ha taha ‘oku lolotonga feitama pe ‘oku ‘i ai ha pēpē valevale ‘i homou ‘api´?
• ‘Oku toko lahi ‘a kinautolu ‘oku mou nofo fakataha ‘i ‘api´?
• ‘Oku ‘i ai ha fānau si‘i hifo he ta‘u 19 ‘oku mou nofo fakataha ‘i ‘api kuo nau nofo falemahaki ‘i he kuo hili´ koe‘uhi ko e ngaahi mahaki hangē ko e niumōnia, mahaki ‘o e ma‘ama‘a pe bronchiolitis, mofi hui mo e meningitis?
• ‘Oku ‘i ai ha fa‘ahinga tokoni mei he pule’anga´ ‘oku ma‘u ho fāmili´ he lolotonga´ ni?

Kapau ‘oku ‘ikai ke ke fakapapau‘i pe ‘oku ‘i ai ha‘o totonu ki he ngaahi tokoni´, ‘e lava ke ke vakai ki he lisi ‘oku hā atu ‘i lalo´ ki he ngaahi potungāue tokoni ofi taha´.  Kapau he ‘ikai ke nau lava ‘o tokoni‘i koe ‘o fakafou ‘i he Healthy Homes Initiative, ‘e lava ke nau fakahoko koe ki ha ngaahi tokoni kehe.

‘E to e lava ke ke vakai ki he peesi ko e 'Keeping your home healthy' ki ha ngaahi founga ‘e lava ke to e lelei ange ai ‘a e nofo ‘i ‘api´.

Tauhi ‘a ‘api ke mo‘uilelei ‘a kinautolu ‘oku nofo ai´

‘E lava ke ke kole hangatonu pē ki he Healthy Homes Initiative ki ha tokoni pe ko ha mēmipa ho fāmili´.

‘Oku ‘atā ‘a e tokoni ‘a e Healthy Homes Initiative ki he ngaahi fāmili ‘oku ‘i ai ‘enau totonu ‘i ha fa‘ahinga feitu‘u pē ‘i Nu‘u Sila´ni pea ‘oku hā atu ‘a e ngaahi feitu‘u ‘oku ‘i ai ‘a e ngaahi ‘ōfisi´.  Fili ‘a e ngaahi potungāue pe kautaha ofi taha kiate koe´ pea mo fakafonu ‘a e foomu ‘i he ‘initaneti´ pe fetu‘utaki telefoni ki he fika ‘oku hā atu´.

Kapau ko e taha ko e ‘o e ngaahi kautaha pe potungāue ‘oku fengāue‘aki mo ha fāmili, kātaki ‘o fakamahino mai eni ‘i he foomu´ fakataha mo ho hingoa´ mo ho fika telefoni.

If you do not see a location where you live, select the closest provider. Our service operates across the entire country.

Ngaahi foomu fakahinohino ki he Healthy Homes Initiative

‘Oku ‘i ai pē ‘a e ngaahi tokoni fakapa‘anga kehe kapau ‘oku ‘ikai ke lava ke ma‘u ‘a e ngaahi tokoni mei he Health Homes Initiative

‘Oku ‘i ai ‘a e ngaahi tokoni ‘oku kei ‘ataa